радиостанция

радиобайланысты жүзеге асыруға арналған техникалық құрылғылар кешені. Р. қарулы күштердің барлық түрлерінде әскерлерді (күштерді) және қаруларды соғыс кезінде де, бейбіт кезде де басқару үшін қолданылады. Флотта, әскери-әуе күштерінде, танк әскерлерінде Р. байланыс пен басқарудың негізгі (көбінесе жалғыз) құралы болып келеді. Ол беруші, қабылдаушы немесе қабылдаушы-беруші болып келуі мүмкін. Р. антенналы-фидерлі құрылғылардан, радиобергіштен және (немесе) радиоқабылдағыштан, соңғы аппараттардан, электрқоры көздерінен тұрады. Әскери Р. байланыс үшін радиотолқындарды (радиожиіліктерді) қолдануына байланысты — өте ұзын толқынды (ӨҰТ), ұзын толқынды (ҰТ), орташа толқынды (ОТ), қысқа толқынды (ҚТ), ультрақысқа толқынды (УҚТ), берілетін белгілер түріне (жұмыс тегіне) байланысты — телефонды, телеграфты, телефонды-телеграфты, қуаттылығы бойынша — аз қуатты (100 Вт дейін), орташа қуатты (1 кВт дейін), қуатты (1 кВт жоғары), аса қуатты (1 МВт жоғары), арналуы және пайдалану жағдайы бойынша — тасымалды, жылжымалы, кемерлік, тұрақты болып бөлінеді. Тасымалды Р. әскерлерді басқарудың тактикалық буынында радиобайланысты қамтамасыз етуде, жылжымалы Р. басқарудың барлық буындарында (автомобильдерге, ұрыс машиналарына, кемелерге, ұшақтарға және т.б. орнатылады) қолданылады. Тұрақты Р. алыс магистральдық әскери байланысты жүзеге асыруға арналған және арнайы мекемелер мен құрылыстарда орналастырылады.